Byaheng 2010

I got an email an hour ago, it’s a poem written by Andrew, he is my eldest sister’s son who is currently working overseas (mabuhay ang mga OFW). The poem talks about mishaps in 2009 and the challenges of 2010. And I want to share it with you thru my blog in time with the 2010 countdown. Wishing you all a meaningful 2010 and the years ahead. God bless us all.

NUEBE: ANG KWENTO NG PAGTATAPOS
(Ngitngit, Galit, Inggit at ang Biyaheng 2010)

ni Andrew Faye Semilla

Tatlong daan at animnapu’t limang araw ang nagdaan,
Karanasang sukdulan sa kaibuturan ang aming naramdaman,
Mga pangyayaring kailanman ay hinding-hindi malilimutan,
At sa tingin ko ay wala sinuman ang nais itong alalahanin pa at balikan.

Nuwebe ang taon na kung kelan nangyari ang mga paghahamon,
Mga sakuna, trahedya, kamatayan, dagok ang siyang sa atin ay lumamon,
Kahirapang nagpalugmok pa sa madlang tanging dasal ngayon sa Poon
Na sana sa taong hinaharap ay hindi na muling maranasan ang ganitong panahon.

Ang taong ito ay nag-iwan ng mala-delubyong pangyayari,
Nagsimula noong Enero’ng problemang dulot at dala nina Hayden Kho at Halili,
Pumagitna sa taon ang paghagupit ng makasaysayang Ondoy, Pepeng at mga buhawi,
At nagtapos sahumahambalos na pagputok ng pinakaperpektong bulkang Mayon na kumakandili.

Simulan natin ang kwento sa pagpanaw ng mga kilala at karespe-respeto,
Nasilayan natin ang pamamaalam, huling sayaw, kanta at huling mga El Bimbo,
Tulad nina Michael Jackson, Patrick Swayze at ang sarili nating si Kikong pilipinong-pilipino,
Talaga namang ang luksa ay umabot sa bawat sulok ng mundong ito.

Sa larangan ng pulitika, mga Pilipino’y muling nasubukan,
Mga pangyayaring sanhi ng dalamhati’t ngitngit sa muling kasaysayan,
Nang namayapa si Cory, ang unang ina ng perlas ng silanganan,
At ang karumal-dumal na pagpaslang sa Maguindanao nang pamilya Ampatuan.

Ngayong taon din natin nakita kung paano gumalaw ang pulitika sa bayan.
Dahil sa ang eleksyon ay ilang buwan na lamang na masisilayan.
Kaya naman sunod-sunod na ang mga bakbakan at patayan,
Daig pa ang World War II sa dala nitong takot sa madlang-bayan.

Napag-usapan na rin ang eleksyong kaabang-abang,
Nagsimula na rin naglipana ang mga buktot sa kapangyarihan at makabagong aswang,
Mga paru-parong ligaw at mga lintang pilit na kumakapit sa punyal ng kayamanan
At mantakin nyo’y pati ngani’y pangulo’y muling tatakbo dahil sa siba at katakawan.

Trahedya, sakuna,pinsala at delubyo,
Paglubog ng mga barko at pagbagsak ng mga eroplano
Pagkawasak ng bansa dahil sa dulot ng mga baha’t bagyo,
Ay iilan lamang sa bakas na iiwan ng taong ito sa bawat Pilipino,

Ang 2009 ay taon, na ang mga kababayan natin ay nasubukan ang angking kabayanihan
Sa kabila ng dalamhati’t kadilima’y, si Juan dela Cruz ay pilit na tumayo at lumaban,
Walang nagawa ang mga bagyo sa lakas ng pwersa ng mamamayan,
Dahil sa kapit-bisig, ang lampas sa tao na baha ay talaga namang nalampasan.

Talaga nga namang ang nuwebeng ito ay walang sinuman ang makakalimot.
Sa hapdi, pasakit, kirot at rubdob sa damdami’y talaga namang sumusuot.
Mga pangyayaring nais nang mawala at pilit na ibabaon sa limot,
Dahil sa nangangarap na sana ang 2010 ay hindi na tayo muling sisimangot.

Tanging dasal ko sa pag-alis ng nuwebe sa atin,
Ay madala nito ang lahat ng dusa at pasakit at tuluyan ng kalimutin,
Na sana sa pagpasok ng ika-sampu sa buhay ng bawat isa sa atin,
Ay mayroon tayong magandang umagang sisilalayan at mamahalin.

Sana sa pagtatapos ng unang dekada ng milenyong ito,
Matuto na sana tayo sa idinulot ng mga kasaysayang tulad ng ganito,
Na ang tanging naging pahiwatig nito ay magkaisa at mahalin ang ating mundo
Pahalagahan natin ang biyayang handog ng Ama nating sa ati’y nagmamahal, tapat at totoo.

Harapin natin ang DYIS nang may galak,
Maligayang Pasko at masaganang bagong taon sa lahat!